გამოეზარდა ჩემი სახლი კედლებად მიწას.
ვწერ ნებადართულ მარტოობაზე.
დამშრალი სისხლის უდაბნოში მზე ჩადის,
ფრთხილად, კარები იკეტება!
ნუ მოაყოლებ კარში იმედს,
წინაპრის მიერ დატოვებულ მარშრუტზე - ნიშანს.
შემოაბრუნე მზერა შიგნით,
რიტმი შეუწყვე ქვების ნელ და ნესტიან სუნთქვას.
ექსკალატორს ჩაატანე,
ჩაკეცე ყველა მეორეხარისხოვანი ცოდვა,
იფიქრე ზემოთ დარჩენილთა ამინდებზე,
მათ ქარი შუბლს უნაოჭებს.
დათვალე ლამპიონები,
ჩამქრალებიც მიათვალე, -
ისინი ოდესმე ანათებდნენ.
ეს გზა
სიხარულის გამხელასავით უხერხულია
და
გაიწელა.
ნატო ინგოროყვა – © 2013. ყველა უფლება დაცულია.